Lëvizja Europiane në Shqipëri (EMA) në bashkëpunim me Friedrich Ebert ( FES) organizoi sot në datë 16 tetor 2009, në Hotel Rogner forumin e politikave mbi “Presidencën Suedeze të BE- së dhe implikimet e saj në procesin e zgjerimit të Ballkanit Perëndimor”.

E ftuar në këtë forum ishte Znj. Elisabeth Stam, Përfaqësuese e Konsullatës Suedeze në Shqipëri e cila mbajti një fjalim mbi prioritetet e Presidencës Suedeze të BE dhe qasjen e saj ndaj vendeve të Ballkanit Perëndimor.

Znj. Stam, lidhur me liberalizimin e vizave theksoi se:”Shqipëria dhe Bosnje-Hercegovina nuk janë përfshirë në propozimin e Komisionit Europian për të përfituar liberalizimin e vizave për shkas se këto vende duhet fillimisht të përmbushin kushtet e përcaktuara në Udhërrëfyes, për të përfituar më pas një vlerësim pozitive nga Komisioni”. Në këtë kontekst, Përfaqësuesja e Konsullatës Suedeze përmendi pohimin e ministrit të Jashtëm Suedez Z. Carl Bildt mbajtur në 21 Korrik 2009, ku thuhet: “Qytetarët e këtyre vendeve që nuk përfituan nga liberalizimi i vizave janë viktima të pazotësisë së liderëve të tyre politikë për të marrë vendime që do të përmbushin kërkesat e paracaktuara siç është prodhimi i pasaportave biometrike. Lidhur me aludimet se propozimet e Komisionit Europian ndikohen nga prania e besimit mysliman në këto vende Znj. Stam deklaroi: “Këto supozime janë një mënyrë e thjeshtë për politikanët për të larguar përgjegjësinë nga mangësitë e punës së tyre duke drejtuar gishtin nga Brukseli. Kjo përqasje për çështje që lidhen me përkatësinë etnike dhe fetare në një rajon si Ballkani, jo vetëm që është e gabuar por edhe e rrezikshme. Kjo gjë është e patolerueshme”.

Një tjetër temë e prekur nga përfaqësuesja  suedeze në Tiranë ishte aplikimi i Shqipërisë në BE, i cili është i lidhur ngushtë me procesin e zgjedhjeve parlamentare. Sipas pikëpamjes së saj, Shqipëria ka lëvizur gradualisht drejt integrimit evropian dhe pritshmëritë e saj për të ardhmen e Shqipërisë në BE janë pozitive. Gjatë fjalimit, znj. Stam theksoi “ Ne shpresojmë që ministrat e jashtëm të BE-së do të arrijnë një marrëveshje për të çuar para aplikimin e anëtarësisë së Shqipërisë në Komision.” Sipas saj, zgjedhjet parlamentare edhe pse ishin pozitive në përgjithësi, fatkeqësisht u shoqëruan me ndërhyrje politike në procesin pas zgjedhor.

Drejtori i FES për Shqipërinë Z. Michael Ëeichert,gjatë fjalimit të tij përshëndetës theksoi se: Ky është një moment i rëndësishëm për marrëdhënie e BE me Ballkanin Perëndimor dhe nevojitet një Selanik i dytë (Referencë e lidhur me takimin e Këshillit Europian në Selanik të 2003) për të nxitur më shumë avancimin e procesit të zgjerimit”.

Gjatë takimit Z. Gledis Gjipali, Drejtori Ekzekutiv i Lëvizjes Europiane në Shqipëri (EMA) prezantoi punimin me titull “Presidenca Suedeze e BE- së dhe implikimet e saj në procesin e zgjerimit të Ballkanit Perëndimor”. Ky punim pasqyron zhvillimet e fundit të Ballkanit Perëndimor nën presidencën aktuale të BE-së duke u ndalur në mënyrë të veçantë në rastin e Shqipërisë. Aktualisht vendi ynë përballet me dy sfida themelore në rrugën drejt integrimit europian: fillimi i shqyrtimit të aplikimit për anëtarësim në BE dhe përfitimi nga procesi i liberalizimit të vizave.

Punimin mund ta gjeni bashkangjitur në Anglisht dhe Shqip.