Kjo rubrikë ofron një përshkrim të detajuar të të gjitha aktiviteteve të ndërmarra nga stafi i EMA-s që nga themelimi i saj në vitin 2007. Aktivitetet tona synojnë të kontribuojnë në rigjallërimin e debatit publik mbi procesin e integrimit Europian të Shqipërisë përmes fushatave të ndërgjegjësimit dhe informimit të publikut. Përpos kësaj, EMA është e angazhuar në mënyrë aktive në ndërtimin dhe forcimin e kapaciteteve profesionale të aktorëve të ndryshëm të cilët përpiqen për të krijuar një shoqëri më të mirë që përqafon vlerat dhe standardet e BE-së.

Për të realizuar objektivat dhe synimin kryesor të saj, EMA është e përfshirë në disa lloj ndërhyrjesh të tilla si: trajnime, forume politike, leksione publike, seminare, konferenca, tryeza të rrumbullakëta, praktika, vizita studimore, si dhe fushata informimi dhe ndërgjegjësimi.

Këto lloj ndërhyrjesh janë të kombinuara me katër fushat në të cilat EMA kryen aktivitetin e saj (lidhur ngushtësisht me: promovimin e vlerave europiane dhe procesit të Integrimit Europian të Shqipërisë, demokracinë dhe mirëqeverisjen, dimensionin ekonomiko - social të integrimit Europian dhe bashkëpunimin në Rajon) si dhe me grupet e fokusuara të cilat synohen të preken nga këto ndërhyrje.

Ndërhyrjet e EMA-s ndikojnë një gamë të gjerë të publikut si: studentë, hulumtues/ analistë, fermerë, përfaqësues të shoqërisë civile dhe qeverisjes vendore, gazetarë dhe komunitetin Rom.